Вилоят  Матбуот  уйида  вилоят  ер  тузиш  ва  кўчмас  мулк  кадастри  давлат  корхонаси  масъул  ходимлари  иштирокида  матбуот  анжумани  бўлиб  ўтди.

Унда  Ўзбекистон  Республикаси  Вазирлар  Маҳкамаси  томонидан  2015  йил  7  октябрда  қабул  қилинган  “Тадбиркорлик  фаолиятини  амалга  ошириш  учун  танлов  асосида  ер  участкалари  бериш  тартиботларини  ва  қурилиш  учун  рухсатномалар  олиш  тартибини  янада  такомиллаштириш  чора-тадбирлари  тўғрисида”ги  қарори  талаблари  ва  ижроси  тушунтирилди.

Кун  тартибидаги  масала  бўйича  вилоят  ер  тузиш  ва  кўчмас  мулк  кадастри  давлат  корхонаси  бошлиғи  Равшан  Ҳотамов  сўз  юритди.

Таъкидландики,  эндиликда  тадбиркорларга  ер  танлов  асосида  берилади.  Ушбу  ер  участкалари  рўйхатини  шакллантириш  вилоятлар  ҳокимлиги  томонидан,  ер  участкаларининг  рўйхати  шаклида,  улардан  фойдаланишнинг  мақсади,  майдони  ва  жойлашган  жойи  кўрсатилган  ҳолда  ҳар  йили  15  январгача  ва  15  июлгача  тақдим  этиладиган  туман  (шаҳар)лар  ҳокимликларининг  таклифлари  асосида  амалга  оширилади.  Маҳаллий  ҳокимликларга  эса  архитектура  ва  қурилиш,  ер  ресурслари  ва  давлат  кадастри  ҳамда  бошқа  тегишли  ташкилотларнинг  таклифлари  тақдим  этилади.

2016  йилда  туман  ва  шаҳар  ҳокимликлари  томонидан  тегишли  ташкилотлар  маълумот  ва  таклифлари  асосида  рўйхат  шакллантирилиб,  507  та  ер  участкалари  танловга  қўйилди.  Июнь  ойида  танлов  савдолари  ўтказилиб,  187  та  участка  бўйича  ғолиблар  аниқланди.  Бир  қатор  участкаларга  талабгор  тадбиркорлар  фақат  биттадан  бўлганлиги  сабабли  қоидага  мувофиқ  уларнинг  таклифлари  очилмади.

Анвар Мустафоқулов