Ўзбекистон Республикаси Конституциясиқабул қилинган кун муносабати билан Самарқанд вилоятининг шаҳар, туманларида бир қатор маданият ва спорт объектлари фойдаланишга топширилди. 

Жумладан, Пайариқ туман Челак шаҳарчасида жойлашган 1-сон болалар ва ўсмирлар спорт мактаби тўлиқ таъмирдан чиқарилди. Шунингдек, унинг қошида янги спорт зали ҳам бунёд этилди. Республика Болалар спорт жамғармаси ҳисобидан 2 миллиард 600 миллион сўм сарфланиб барпо этилган мазкур спорт масканида кийиниш ва ювиниш хоналари, маъмурият ва мураббийлар учун махсус хоналар бор.

Ургут туманидаги 1-сон болалар ва ўсмирлар спорт мактаби қошида янги ёпиқ сузиш ҳавзаси ҳам ёш спортчилар ихтиёрига топширилди. Спорт мактабининг қурилиш-таъмирлаш ишларига Болалар спортини ривожлантириш жамғармаси ҳисобидан 2 миллиард 600 миллион сўм сарфланди. Мазкур масканда туман аҳлининг қарийб 900 нафар ўғил-қизлари спортнинг етти тури билан мунтазам шуғулланишади. Энди эса мактабда сузиш билан шуғулланадиганлар сони ортадиган бўлди.

2015 йилда Самарқанд вилоятида жамғарма маблағлари ҳисобидан 40 та спорт зали, 1 та мусиқа ва санъат мактаби, 1 та сузиш ҳавзаси қурилиб, фойдаланишга топширилди. 4 та Болалар ва ўсмирлар спорт мактаби қайта таъмирдан чиқарилди. Уларга жамғарма маблағлари ҳисобидан жами 48,5 миллиард сўм сарфланди.

Д. Тўхтаев