Бу йил Самарқанд вилоятидан 400 нафар фуқаролар муқаддас ҳаж зиёратини амалга оширишадилар.

Самарқанд халқаро аэропортида зиёратчиларнинг дастлабки гуруҳини Саудия Арабистонига кузатиш маросими бўлиб ўтди. 

Тадбирда Ўзбекистон Мусулмонлари идораси вилоят вакиллиги, давлат ва жамоат ташкилотлари вакиллари, зиёратчиларнинг яқинлари иштирок этди.

– Давлатимиз томонидан бу йил ҳам  зиёратчиларга барча шароит ва қулайликларни яратишга алоҳида эътибор қаратилмоқда, – дейди вилоят бош имом хатиби Нуриддин Исломов. – Зиёратчиларнинг рўйхати шакллантирилгач, тиббий кўрикдан ўтказилди.

Саудия Арабистонида ҳаво ҳароратининг юқори даражада бўлиши кузатилаётганлигини инобатга олиб, шифокорлар гуруҳи томонидан эслатма-тавсиялар ишлаб чиқилди.

Шунингдек, зиёратчиларга ҳаж амаллари бўйича тегишли тушунтириш ишлари олиб борилди. Сафардан олдин давлат рамзи туширилган махсус кийим ва йўл халталари, “Ҳажнома” қўлланмаси ва видеотасмалар тақдим этилди.

Бўлажак ҳожилар Самарқанддан чартер рейс орқали Мадина шаҳрига учиб кетишди.

Тадбирда вилоят ҳокими З.Мирзаев иштирок этди.