Самарқанд шаҳрида “Менинг ўғлим – Ватан ҳимоячиси” мавзусида байрам тадбири ўтказилди. 

Тадбир телемулоқот тарзида ташкил этилиб, Фарғонадан Самарқанд вилоятига келиб ҳарбий хизматни ўтаётган аскарлар ҳамда Фарғонада йигитлик бурчини ўтаётган аскарларнинг ота-оналари иштирок этишди.

Мулоқотда сўз олганлар Ватан ҳимояси муқаддас бурч эканлиги, мамлакатимизда ватанимиз мудофаа қудратини юксалтириш, ҳарбийларнинг хизматни аъло даражада адо этишлари учун яратилган шарт-шароит, уларга кўрсатилаётган эътибор ва ғамхўрлик хусусида гапирдилар. Аскарлар ота-оналари билан суҳбатлашишди. Ота-оналар ўз фарзандлари билан бевосита гаплашдилар, дил сўзлари ва тилакларини изҳор этдилар.

Тадбирда вилоят ҳокимининг ўринбосари, хотин-қизлар қўмитаси раиси Н.Раббимова иштирок этди.