Вилоят хотин-қизлар қўмитаси соғлиқни сақлаш бошқармаси билан ҳамкорликда саломатлик сектори фаолларини тақдирлаш маросимини ўтказди. 

Тадбирда шаҳар ва туман хотин-қизлар қўмиталари, “Маҳалла” хайрия жамоат фонди вакиллари, тиббиёт бирлашмалари бош ҳамширалари иштирок этди.

Тадбирда вилоят ҳокимининг ўринбосари, хотин-қизлар қўмитаси раиси Н.Раббимова ва бошқалар иштирок этиб, саломатлик секторининг аҳамияти, ҳамкорликда олиб борилаётган ишларнинг ютуқ ва камчиликларига тўхталдилар.

– 35 йилдан бери Каттақўрғон туманидаги «Қирғиз» қишлоқ врачлик пунктида фаолият юритаман, – дейди «Энг намунали патронаж ҳамшира» номинациясида 3-ўринга сазовор бўлган Орзигул Мусурмонова. – Ўзим фаолият кўрсатаётган Қирғиз қишлоғи аҳлини жуда яхши танийман, уларнинг хасталиклари ҳам менга маълум. Бир кунда маҳалла фаоли билан 15 та оилага кириб, уларга тегишли тавсияларни бериб келамиз.

Танлов ғолиблари ташкилотчиларнинг диплом ва эсдалик совғалари билан тақдирланди. «Энг намунали саломатлик сектори» номинациясига сазовор бўлган Пайариқ туманидаги “Чоштепа” қишлоқ врачлик пункти танловнинг республика босқичида иштирок этиш ҳуқуқини қўлга киритди.

Гулруҳ Мўминова